Hezkuntza, Arteak eta Hiritartasuna IX. Mintegia: emakumeen parte-hartzea kulturan
Datorren maiatzaren 22an, ostirala, UN Etxea – UNESCOren Euskal Herriko Elkarteak Hezkuntza, Arteak eta Hiritartasuna IX. Mintegia antolatuko du, UNESCOren Hezkuntza Kultural eta Artistikoaren Nazioarteko Astearen baitan. Topaketa Guggenheim Bilbao Museoaren Auditorioan izango da, 10:00etatik 14:30etara, eta parte-hartzea doakoa izango da, aldez aurretik izena emanda.
Edizio honek emakumeek kultur bizitzan duten parte-hartze osoa eta eraginkorra jartzen du erdigunean, eta aintzat hartzen du sortzaile, bitartekari, hezitzaile, kudeatzaile eta eraldaketa sozialeko eragile gisa duten rola. Mintegiak hausnarketa partekatua sustatzeko gune bat sortzea du helburu, erakundeen, kultur profesionalen, hezkuntza komunitatearen eta gizarte zibilaren artean, kultur arloko sarbidean, parte-hartzean eta aitortzan berdintasunarekin lotutako erronkak eta aukerak lantzeko.
Eskubideen eta generoaren ikuspegitik garatutako hezkuntza kultural eta artistikoa
Topaketak kontuan hartuko du, halaber, UNESCOren Hezkuntza Kultural eta Artistikorako Esparru berria, zeinak kulturak gizarte bidezkoago, inklusiboago eta jasangarriagoak eraikitzeko duen funtsezko eginkizuna azpimarratzen duen. Testuinguru horretan, mintegiak arreta jartzen du herritartasunaren ikuspegitik genero- eta ikuspegi intersekzionala txertatzen duen hezkuntza kultural eta artistikoa bermatzeko beharrean; desberdintasun estrukturalak zalantzan jartzeko, erreferente anitzak ikusarazteko eta emakumeen ibilbide kulturalak esparru guztietan indartzeko gai den hezkuntza.
Jardunaldian zehar, gai garrantzitsuak landuko dira, hala nola kulturarako sarbide bidezkoa, hezkuntzak eraldaketa sozialean duen eginkizuna edo kultur gune inklusibo, anitz eta seguruak eraikitzea.
Programa zabala eta parte-hartzailea
Mintegiak hitzaldiak, elkarrizketak eta esperientzien mahaiak uztartuko ditu, eta bertan arte, hezkuntza eta kultur arloko profesionalek parte hartuko dute, besteak beste Lorna Biermann, Jemima Cano, Estitxu Moral Osa, Garazi Arrizabalaga, Yannick Bergara eta Begoña Guzmánek, beren ekimenak, esperientziak eta erronkak partekatuz.
Jardunaldia Lorena Pazos Rojok gidatutako antzerki-pedagogiako tailer batekin amaituko da, gorputza, ekintza eta horiek hezkuntza- eta kultura-prozesuetan duten eraldaketa-ahalmena aztertzeko.
Izen-ematea
Mintegira joatea doakoa da. Izena emateko, Guggenheim Bilbao Museoaren webgunera jo behar da, eta bertan eskuratu ahal izango dira sarrerak: https://tickets.guggenheim-bilbao.eus/eu/396-visitas-guiadas-actividades/13046-seminario-un-etxea/info
Horrez gain, 10 plaza daude “Gorputza, ekintza eta eraldaketa” antzerki-pedagogiako tailerrean parte hartzeko. Tailerra, doakoa ere bada, formulario honen bidez kudeatuko da: https://forms.gle/KYEtwjSFFFs3jW6ZA
Antolatzailea
UN Etxea – UNESCOren Euskal Herriko Elkartea, Eusko Jaurlaritzako Giza Eskubide, Biktima eta Aniztasun Zuzendaritzaren eta Guggenheim Bilbao Museoaren TOParte programaren laguntzarekin.
Ekimen honen bidez, UN Etxeak berretsi egiten du kultura-eskubideen, genero-berdintasunaren eta hezkuntza kultural eta artistikoaren sustapenarekiko konpromisoa, gizarte bidezkoagoak, anitzagoak eta kohesionatuagoak eraikitzeko funtsezko tresna gisa.
Informazio gehiago
Begoña Guzmán Sánchez
UN Etxea – UNESCOren Euskal Herriko Elkartea
Kultur arduraduna
(+34) 94 427 64 32
Aurreikusitako programa eta ohar kontzeptuala 
