Bat gatoz garapen jasangarrirako, bakerako eta egonkortasunerako kulturaren funtzioari emandako bultzada berria, erresilientziaren, inklusioaren eta gizarte-kohesioaren, ingurumenaren babesaren eta hazkunde jasangarri eta inklusiboaren eragile gisa. Horretarako, gizakia ardatz duen eta testuinguru bakoitzerako espezifikoa den garapena sustatu behar da. Kultura eta hari lotutako eskubideak garapen-estrategietan txertatzea funtsezkoa da 2030 Agenda kokatzeko eta Garapen Jasangarrirako Helburuak lortzeko.

Garapen jasangarria ezin da lortu, baldin eta giza eskubideak eta, beraz, kultura eskubideak erabat errespetatzen ez baditu. Eskubide kulturalek pertsona guztien eskubideak babesten dituzte, beren gizatasuna, mundu-ikuskera eta existentziari eta garapenari ematen dioten esanahia garatzeko eta adierazteko, honako hauen bidez, besteak beste: balioak, sinesmenak, konbikzioak, hizkuntzak, ezagutzak eta arteak, erakundeak eta bizimoduak. Kultura ondarerako eta identifikazio- eta garapen-prozesu horiek gauzatzeko bidea ematen duten baliabideetarako sarbidea ere babesten dute.

Artea giltzarria da oinordetzan jasotako mundua berrasmatzeko gai diren belaunaldiak trebatzeko. Kultura-nortasunen bizitasuna indartzen du eta beste erkidego batzuekiko harremanak sustatzen ditu, eta hala, ondare bateratu bat eraikitzen laguntzen du. Halaber, gure mundu globalizatuan toleranteak eta dinamikoak diren herritarrak trebatzen laguntzen du. GizARTE sarea sustatzen dugu. Hezkuntzarekin, sormenarekin eta kulturaren kudeaketarekin lotutako pertsonak eta erakundeak biltzen ditu sare horrek, EAEn eraldaketa soziala bultzatzeko hezkuntza-programetan parte hartzen dutenak.